Agronomiya

Agronomiya bakalavriat ta’lim dasturi (60810400) Qishloq xo‘jaligi sohasiga tegishli bo‘lib, o‘simlik yetishtirish va qishloq xo‘jaligi resurslaridan samarali foydalanish bo‘yicha yuqori malakali mutaxassislarni tayyorlaydi.

Ushbu dastur yer, suv, energiya va moddiy-texnik resurslardan samarali foydalanishga, qishloq xo‘jaligi ekinlarini yetishtirishda zamonaviy, resurs tejamkor va innovatsion texnologiyalarni qo‘llashga, ishlab chiqarish jarayonlarini optimallashtirishga hamda hosildorlik va mahsulot sifatini oshirishga yo‘naltirilgan. Talabalar agronomiya, tuproqshunoslik, o‘simlik yetishtirish, o‘simliklarni himoya qilish asoslari hamda ishlab chiqarish vositalaridan oqilona foydalanish bo‘yicha kasbiy kompetensiyalarni egallaydilar.

Dastur davomida talabalar nazariy bilimlar bilan bir qatorda amaliy tajribaga ham ega bo‘ladilar. Bitiruvchilar turli mulkchilik shaklidagi fermer xo‘jaliklari va qishloq xo‘jaligi korxonalarida, agroklasterlarda, urug‘chilik va ekin yetishtirish tashkilotlarida, ilmiy-tadqiqot institutlarida hamda davlat va mahalliy qishloq xo‘jaligi boshqaruv organlarida agronom va mutaxassis sifatida ishlash, shuningdek, sohada keyingi ta’lim va ilmiy-pedagogik faoliyatni davom ettirish uchun tayyorlanadilar.