Islom iqtisodiyoti va moliyasi

70411701 – “Islom iqtisodiyoti va moliyasi” magistratura mutaxassisligi islom iqtisodiyoti va moliyasi sohasida chuqur nazariy bilim, ilmiy-tadqiqot ko‘nikmalari hamda amaliy boshqaruv kompetensiyalariga ega yuqori malakali mutaxassislar tayyorlashga qaratilgan. Magistratura ta’limi kunduzgi shaklda kredit-modul tizimi asosida tashkil etilib, o‘qishning me’yoriy muddati 2 yilni tashkil etadi.
Magistratura dasturi doirasida magistrantlar islom iqtisodiyoti va moliyasining zamonaviy yo‘nalishlari, ilmiy tadqiqot metodologiyasi, shariat auditi, islom bank amaliyoti, islom moliya institutlarining moliyaviy hisobi, islom sug‘urtasi (takaful), islom banklarida risk-menejment, islom moliyasida portfel va aktivlarni boshqarish kabi ixtisoslik fanlarini chuqur o‘zlashtiradilar. Ta’lim jarayoni nazariy bilimlarni amaliy mashg‘ulotlar, ilmiy izlanishlar va soha korxonalaridagi stajirovkalar bilan uyg‘unlashtirishga asoslangan.
Mazkur mutaxassislik bitiruvchilari islom banklari, islomiy moliya xizmatlari ko‘rsatuvchi tashkilotlar, takaful kompaniyalari, investitsiya va lizing kompaniyalari, zakot va vaqf institutlari, davlat boshqaruv organlari, xalqaro moliya institutlari, ilmiy-tadqiqot markazlari, konsalting tashkilotlari hamda oliy ta’lim muassasalarida faoliyat yuritish imkoniyatiga ega bo‘ladilar. Shuningdek, ular iqtisodiy va moliyaviy munosabatlarni takomillashtirish, islom moliyasi mahsulotlarini ishlab chiqish va joriy etish, investitsiya loyihalarini baholash, moliyaviy boshqaruv tizimlarini takomillashtirish hamda iqtisodiy taraqqiyotga oid ilmiy-amaliy takliflar ishlab chiqishda ishtirok etadilar.
Ta’lim jarayonida magistrantlarda mustaqil ilmiy tadqiqot olib borish, iqtisodiy va moliyaviy jarayonlarni statistik, iqtisodiy-matematik hamda ekonometrik usullar orqali tahlil qilish, ilmiy maqolalar va monografiyalar tayyorlash, milliy va xalqaro ilmiy loyihalarda ishtirok etish, ilmiy natijalarni amaliyotga tatbiq etish kompetensiyalari shakllantiriladi. Ular AAOIFI, IFSB va IFRS kabi xalqaro standartlarni qo‘llash, shariat talablariga muvofiq moliyaviy instrumentlardan samarali foydalanish, islom moliya institutlari faoliyatini tahlil qilish va baholash bo‘yicha yuqori malakaga ega bo‘ladilar.
Magistratura dasturining muhim tarkibiy qismi sifatida ilmiy-tadqiqot ishlari, ilmiy-pedagogik faoliyat, magistrlik dissertatsiyasini tayyorlash va himoya qilish hamda ilmiy amaliyot (stajirovka) nazarda tutilgan. Bu jarayonlar magistrantlarda mustaqil tadqiqot olib borish, innovatsion g‘oyalar ishlab chiqish, zamonaviy pedagogik va raqamli texnologiyalardan foydalanish, ilmiy xulosalarni amaliyotga joriy etish hamda kasbiy faoliyatda strategik qarorlar qabul qilish ko‘nikmalarini shakllantiradi.
Mazkur mutaxassislikni muvaffaqiyatli tamomlagan bitiruvchilar islom iqtisodiyoti va moliyasi sohasida ilmiy-tadqiqotchi, oliy ta’lim muassasalarida pedagog, islom banklari va moliya institutlarida tahlilchi, risk-menejer, investitsiya mutaxassisi, shariat auditi va konsalting sohalarida yuqori malakali ekspert sifatida faoliyat yuritish imkoniyatiga ega bo‘ladilar.