Qo‘qon davlat universiteti talabalarining Mo‘ynoqqa ekosayohati
Bugungi kunda global iqlim o‘zgarishlari, ekologik barqarorlikni ta’minlash va tabiatga nisbatan insoniy mas’uliyatni oshirish masalalari har qachongidan ham dolzarb ahamiyat kasb etmoqda. Mamlakatimizda Orol fojiasi oqibatlarini yumshatish, hududda yashil maydonlarni kengaytirish va Orolbo‘yining turistik salohiyatini yuksaltirish borasida olib borilayotgan tizimli islohotlar yosh avlod tarbiyasida ham muhim o‘rin tutadi. Ana shunday ezgu maqsadlarni ko‘zlagan holda, Qo‘qon davlat universiteti talabalaridan iborat delegatsiya Qoraqalpog‘iston Respublikasining Mo‘ynoq tumaniga unutilmas ekosayohatni amalga oshirdi.
Ushbu ekosayohat shunchaki tomosha yoki hordiq chiqarish loyihasi emas, balki chuqur ijtimoiy-ma’rifiy va ekologik missiyani o‘z ichiga olgan tashabbusdir. Safardan ko‘zlangan asosiy maqsad — yoshlarda ekologik daxldorlik tuyg‘usini kuchaytirish, talabalarga Orolbo‘yi hududining o‘ziga xos ekotizimi, tabiati va xalqining boy madaniy merosini yaqindan tanishtirish hamda Orolning qurigan tubida amalga oshirilayotgan global yashillashtirish jarayonlari bilan bevosita joyida tanishishdan iborat bo‘ldi.
“Orol fojiasi — nafaqat mintaqaviy, balki umumjahon ekologik muammosidir. Biz talabalarimizni faqat auditoriya ichida auditoriya bilimlari bilan cheklab qo‘ymasdan, ularda yurt taqdiriga, ona tabiatga nisbatan real daxldorlik hissini uyg‘otishni maqsad qilganmiz. Mo‘ynoqqa sayohat jamoamiz uchun haqiqiy hayot maktabi bo‘ldi,” — deydi universitet Yoshlar bilan ishlash, ma’naviyat-ma’rifat bo‘limi boshlig‘i Asrorjon Mahmudjonov.
Sayohat dasturi juda sermazmun va tadbirlarga boy tarzda tashkil etildi. Talabalar dastlab Mo‘ynoq tumanining eng ramziy maskani hisoblangan — sobiq Orol dengizi qirg‘og‘idagi “Kemalar qabristoni”ga tashrif buyurdi. Bir paytlar to‘lqinlanib turgan dengiz o‘rnida qum va sho‘rxoklar aro qaqqayib turgan ulkan temir kemalar manzarasini ko‘rish har bir ishtirokchida chuqur taassurot qoldirdi. Talabalar o‘tmish va bugunning vizual to‘qnashuvini his qildilar.
Shundan so‘ng, jamoa Mo‘ynoq tumani tarixi va Orol dengizi muzeyida bo‘lib, bu yerda saqlanayotgan noyob eksponatlar, fotosuratlar va rassomlarning asarlari orqali hududning o‘tmishdagi gullab-yashnagan davri, baliqchilik sanoati va keyingi ekologik inqiroz dinamikasi haqida batafsil ma’lumotlarga ega bo‘lishdi.
Sobirjon Saburov, talaba: “Mo‘ynoq haqida ko‘p o‘qigan edik, lekin uni o‘z ko‘zimiz bilan ko‘rish mutlaqo boshqacha ekan. Qurigan dengiz tubida turib, tabiatni asrash qanchalik muhimligini yurakdan his qildim. Biz, yoshlar, kelajakda ekologik muammolarni hal qilishda ilm-fan yutuqlaridan samarali foydalanishimiz kerakligini tushunib yetdik.”
Qo‘qon davlat universiteti talabalarining Mo‘ynoq tumaniga uyushtirgan ekosayohati oliy ta’lim muassasalarida ichki turizmni rivojlantirish, talabalarda vatanparvarlik va ekologik madaniyatni yuksaltirish borasidagi eng namunali tadbirlardan biri bo‘ldi. Zero, ona zaminni asrash, Orolbo‘yi kabi o‘ziga xos hududlarni qo‘llab-quvvatlash va tabiat bilan uyg‘unlikda yashash — barchamizning umumiy burchimizdir.
