Qishloq xo‘jalik mahsulotlarini saqlash va qayta ishlash texnologiyasi (mahsulotlar turlari bo‘yicha)

Qishloq xo‘jaligi mahsulotlarini saqlash va qayta ishlash texnologiyasi (mahsulot turlari bo‘yicha) — 60811300 — bakalavriat dasturi qishloq xo‘jaligi sohasiga tegishli bo‘lib, qishloq xo‘jaligi mahsulotlarini saqlash, qayta ishlash va ularning sifatini ta’minlash bo‘yicha yuqori malakali mutaxassislarni tayyorlaydi.

Ushbu ta’lim dasturi yer, suv, energiya hamda moddiy-texnik resurslardan samarali foydalanishga yo‘naltirilgan bo‘lib, meva, sabzavot, uzum va boshqa qishloq xo‘jaligi mahsulotlarini tayyorlash, saqlash va qayta ishlash jarayonlarini qamrab oladi. Talabalar zamonaviy saqlash va qayta ishlash texnologiyalari, ushbu jarayonlarni optimallashtirish, tayyorlangan, saqlangan va qayta ishlangan mahsulotlar sifatini oshirish hamda kasbiy faoliyatda texnik vositalardan oqilona foydalanish bo‘yicha kompetensiyalarni egallaydilar. Shuningdek, o‘quv dasturida mahsulotlarni standartlashtirish, sifat nazorati hamda innovatsion va resurs tejamkor texnologiyalarni joriy etish masalalari ham o‘rganiladi.

Dastur davomida talabalar nazariy bilimlar bilan bir qatorda amaliy ko‘nikmalarni ham egallaydilar. Bitiruvchilar turli mulkchilik shaklidagi qishloq xo‘jaligi mahsulotlarini saqlash va qayta ishlash korxonalarida, oziq-ovqat sanoati korxonalarida, sifat nazorati va sertifikatlash organlarida, ilmiy-tadqiqot institutlarida hamda davlat va mahalliy qishloq xo‘jaligini boshqarish tashkilotlarida ishlashlari mumkin. Shuningdek, ular ushbu sohada ilmiy-pedagogik faoliyatni davom ettirishlari mumkin.