Xitoy delegatsiyasi Xivadagi yangi universitet filiali qurilishi bilan tanishdi
Xitoyning Lyaonin provinsiyasi delegatsiyasi Urganch davlat universitetida bo‘lib, Xiva shahrida barpo etilayotgan yangi xalqaro filial qurilishi va hamkorlik istiqbollarini muhokama qildi.
-
29-aprel kuni Xitoy Xalq Respublikasining Lyaonin provinsiyasi delegatsiyasi Urganch davlat universitetiga tashrif buyurdi. Tashrif doirasida Lyaonin provinsiyasi Xalq hukumati vakillari hamda Lyaonin pedagogika universiteti rahbariyati bilan rasmiy muzokaralar o‘tkazildi. Uchrashuvda Xiva shahrida tashkil etilayotgan Lyaonin pedagogika universiteti filialining ahamiyati, shuningdek, UrDU bilan hamkorlikda tashkil etilayotgan Konfutsiy institutining madaniyatlararo aloqalardagi o‘rni muhokama qilindi.
Tomonlar psixologiya, filologiya va injiniring yo‘nalishlarida hamkorlikni kengaytirish, professor-o‘qituvchilar va talabalar almashinuvini yo‘lga qo‘yish bo‘yicha kelishuvlarga erishdilar. Mehmonlar universitetning Axborot-resurs markazi va Xitoy markazi faoliyati bilan tanishgach, kunning ikkinchi yarmida Xiva shahrida barpo etilayotgan filial qurilish maydonida bo‘lishdi. U yerda kampus infratuzilmasi, o‘quv jarayonini tashkil etish va talabalarni qabul qilish tizimi yuzasidan muhim masalalar ko‘rib chiqildi.
